सातारा  - सोमवारी (ता. 20) वादळी वाऱ्यासह झालेल्या पावसात ढेबेवाडी (जि. सातारा) परिसरातील तळमावले, कुंभारगाव, खळे या गावांतील 60 ते 70 घरांचे नुकसान झाले आहे. सोमवारी सायंकाळी चारच्या सुमारास वादळी वाऱ्यासह झालेल्या पावसात विजेचे खांब पडले असून, अनेक ठिकाणी ओढे- नाल्यांना पाणी आले. पुनर्वसित गावांतील 15 घरांचे व शाळेचे नुकसान झाले आहे. तळमावळे येथील 15 ते 20 घरांचे व शाळा तसेच वसतिगृहाचे छप्पर उडून गेले. खळे येथील धनाजी कचरे यांच्या गुरांच्या गोठ्यावर झाड पडल्याने गोठ्यातील म्हशींचा मृत्यू झाला आहे.

हिंगोली  - आपण शिवसेना तर सोडणारच नाही पण लोकसभा निवडणूक देखील लढवणारच, असे स्पष्टीकरण सेनेचे हिंगोलीचे खासदार सुभाष वानखेडे यांनी केले. येथे एका कार्यक्रमानिमित्त ते आले होते. तेव्हा पत्रकारांशी बोलताना श्री. वानखेडे म्हणाले, ""गेल्या काही दिवसांपासून आपला इतर पक्षात प्रवेश होणार असल्याच्या बातम्या येत आहेत, तसेच मी स्वतः लोकसभेसाठी इच्छुक नसल्याची चर्चा आहे. कधी हदगाव विधानसभा, तर कधी नांदेड शहरातून विधानसभा लढवणार असे छापले जात आहे. काही लोकांनी हा खोटानाटा प्रचार चालवला आहे, पण आपल्याला इतर पक्षांत जाण्यात कोणताही रस नाही. गेल्या काही वर्षांपासून सातत्याने विधानसभा आणि आता लोकसभेच्या राजकारणात असल्याने अनेक नेत्यांशी चांगले संबंध आहेत. मात्र, त्याचा अर्थ आपण पक्ष सोडून जाणार असा होत नाही. आपण विधानसभा निवडणूक लढवणार हा देखील अपप्रचारच आहे. विधानसभा आपण लढवणार नसून विद्यमान खासदार या नात्याने हिंगोली लोकसभेचीच निवडणूक लढवणार आहोत.''

- चंद्रपूर 47.9, नागपूर 47.3, अमरावती 47.2 अंश सेल्सिअस - मध्य महाराष्ट्र, मराठवाडा, विदर्भात "पूर्वमोसमी'चा अंदाज पुणे  - वायव्येकडील उष्ण वाऱ्यांमुळे राजस्थानमध्ये उष्णतेची तीव्र लाट असून, या वाऱ्यांचा परिणाम राज्यातही जाणवत असल्याने उन्हाच्या झळा तीव्र झाल्या आहेत. विदर्भात उष्णतेची लाट कायम असून चंद्रपूरला पारा 48 अंशांवर पोचला आहे. बुधवार (ता. 22) सकाळपर्यंतच्या चोवीस तासांत उष्णतेची लाट कायम राहील, असा इशारा हवामान खात्याने दिला आहे. मध्य महाराष्ट्र, मराठवाडा आणि विदर्भात तुरळक ठिकाणी गडगडाटासह पूर्वमोसमी पावसाचा अंदाज वर्तविला आहे. सोमवार (ता. 20) सकाळपर्यंतच्या चोवीस तासांत संपूर्ण विदर्भात उष्णतेची लाट होती. मराठवाड्यात तुरळक ठिकाणी पाऊस पडला. कोल्हापूर व सांगलीत तुरळक सरी, तर तासगाव पट्ट्यात मध्यम स्वरूपाच्या पावसाने हजेरी लावली. चांदवड (जि. नाशिक) येथे मध्यम स्वरूपाचा पाऊस पडला. कोकणात कमाल तापमानाचा पारा सरासरीच्या तुलनेत एक ते दोन अंश, मध्य महाराष्ट्रात चार ते सहा अंश, मराठवाड्यात तीन ते चार अंशांनी उंचावल्याने उन्हाचा उकाडा वाढला आहे.

गोंदिया  - गोंदिया आणि भंडारा जिल्हा प्रामुख्याने धान उत्पादकांचा जिल्हा आहे, त्याही पलीकडे जिल्ह्यात बागायती पिके मोठ्या प्रमाणात होऊ शकतात. त्यासाठी मूलभूत सुविधांचा अभ्यास करून येथील शेतकऱ्यांना प्रगल्भ करण्यासाठी दोन्ही जिल्ह्यांत फळक्रांतीचा पॅटर्न लवकरच राबविण्यात येणार आहे. आता धान उत्पादक शेतकरी फळक्रांतीच्या दिशेने वाटचाल करणार असल्याचे आश्‍वासन केंद्रीय मंत्री प्रफुल्ल पटेल यांनी दिले. श्री. पटेल यांच्या निवासस्थानी रविवारी (ता. 19) राष्ट्रीय फलोत्पादन बोर्ड, नागपूरच्या उच्चस्तरीय अधिकाऱ्यांची बैठक पार पडली. या वेळी फलोत्पादन बोर्डाचे सहसंचालक ब्रजेंद्र सिंग, सहसंचालक बी. आर. डोंगरे, उपसंचालक अनिलकुमार, भंडाऱ्याचे जिल्हा कृषी अधिकारी आर. बी. चालवडे, विषय विशेषज्ञ वाय. आर. खोब्रागडे, कृषी उपसंचालक युवराज सहारे, तालुका कृषी अधिकारी मंगेश वावधने व अन्य महत्त्वपूर्ण अधिकाऱ्यांची उपस्थिती होती. चर्चेदरम्यान, राष्ट्रीय फलोत्पादन बोर्डाच्या वतीने एकत्रित भाजीपाला लागवड, केळी लागवड, सिमला मिरची, काकडी व अन्य बागायती पिकांचे उत्पादन भरघोस पद्धतीने घेण्याचेही ठरविण्यात आले.

पुणे  - बंगालच्या उपसागराच्या दक्षिणेकडील काही भागात आणि लगतच्या अंदमान समुद्रात पोचलेले नैर्ऋत्य मोसमी वारे (मॉन्सून) पुढच्या दोन ते तीन दिवसांत उत्तरेकडे सरकण्यास परिस्थिती अनुकूल असल्याचा हवामान खात्याचा अंदाज कायम आहे. रविवार (ता. 19) सकाळपर्यंतच्या चोवीस तासांत कर्नाटकात पूर्वमोसमी पावसाने जोरदार हजेरी लावली असून येगट्टी येथे 112 मिलिमीटर पावसाची नोंद झाली. दक्षिण अंदमान व लगतचा भाग तसेच आसाम व मेघालय व नजीकच्या भागावर आणि पूर्व उत्तर प्रदेश व नजीकच्या भागावर चक्राकार वाऱ्यांची स्थिती कायम आहे. दक्षिण मध्य कर्नाटकपासून पूर्व मध्य प्रदेश, विदर्भ, आंध्र प्रदेशच्या मध्यापर्यंत कमी दाबाचा पट्टा सक्रिय आहे. पश्‍चिमी चक्रावात उत्तर पाकिस्तान व लगतच्या भागावर असून त्याची पूर्वेकडे वाटचाल सुरू आहे. रविवार (ता. 19) सकाळपर्यंतच्या चोवीस तासांत कर्नाटकात पूर्वमोसमी पावसाने जोरदार हजेरी लावली. येगट्टी येथे 112 मिलिमीटर, भद्रावती 79, चित्रदुर्ग 68, बाईहोंगल 24, सुब्रमण्य 22, अमलापुरम व सलूर येथे प्रत्येकी 19 मि.मी., तसेच लकीरेड्डीपला 18 व चिरुपल्ली येथे 13 मिलिमीटर पाऊस पडला.